Turistane strøymer til Kviteseid

Reiselivet og handelsnæringa i Kviteseid kommune kan sjå tilbake på ein svært sterk sommar. Hotella melder om vekst, butikkane om auka omsetning – og enkelte har sett nye rekordar.

Målretta marknadsføring, godt samarbeid og ein sommar full av opplevingar ser ut til å gitt resultat.

Sommaren 2026 har så langt vore svært god for reiselivet i Kviteseid. Både Morgedal Spa & Resort og Straand Hotel melder om god vekst i juni og juli samanlikna med fjoråret – som også var ein sterk sommarsesong.

Også handelsnæringa i Kviteseidbyen merkar den positive utviklinga. Fleire butikkar melder om auka omsetning, og enkelte har hatt «all time high» i juli.

«Dette er andre året på rad vi legg inn ein ekstra innsats for å trekkje fleire besøkande til Kviteseid. Vi har jobba målretta med auka synlegheit og marknadsføring, samtidig som vi har hatt ein svært innhaldsrik kultur- og aktivitetskalender gjennom heile sommaren. Festivalar, konsertar, arrangement og opplevingar gir folk stadig nye grunnar til å besøkje kommunen, og gjerne bli litt lenger», seier Vegard Angen Johnsen, prosjektleiar i Kviteseid FRAM.

Gjennom sommaren har det vore stor aktivitet i heile kommunen, frå Morgedal og Kviteseidbyen til Vrådal. Samarbeidet mellom kommunen og næringslivet blir trekt fram som ein viktig del av den positive utviklinga.

«Nøkkelen er at vi jobbar saman. Når kommunen, reiselivsaktørane og handelsnæringa dreg i same retning, får vi større kraft og kan skape meir aktivitet. Det at vi no gjennom to sesongar har hatt så dedikerte og proaktive drivarar av Kviteseid Brygge, har også vore ein viktig suksessfaktor for Kviteseidbyen. Brygga er på mange måtar hjartet i byen», seier næringssjef Elisabeth Lid. Ho meiner erfaringane frå dei siste sesongane viser kor viktig det er å halde fram med samarbeidet. «Det gode samarbeidet skal vi byggje vidare på – ikkje berre i sommarsesongen, men gjennom heile året. Måler er å skape aktivitet, arbeidsplassar og attraktive lokalsamfunn året rundt», seier Lid.

Det gode sommarvêret har naturlegvis også bidrege positivt. Samtidig er det interessant at også innandørsattraksjonar opplever vekst. Norsk Skieventyr i Morgedal er blant aktørane som melder om auka besøk denne sommaren. For handelsstanden i Kviteseidbyen kan ein god sommar ha stor betydning langt utover sjølve høgsesongen. Sommaren er utruleg viktig for oss som driv butikk og servering i sentrum. Når vi får mange besøkande og god omsetning i høgsesongen gir det oss eit sterkare fundament for å oppretthalde eit godt tilbod resten av året. Det bidreg til å nå målet om ein levande og attraktiv Kviteseidby heile året», seier Elizabeth Wisland som driv Kafé Hansen og Elizabeth Mote.

Dei gode sommartala gir både optimisme og motivasjon til å halde fram med satsinga på Kviteseid som reisemål. Ambisjonen er at stadig fleire skal oppdage det kommunen har å by på – og at fleire av dei skal kome tilbake, også utanfor sommarsesongen.